يُمّة

مر عيدين يمّة وعنّج آنه بعيد ... كل يوم الاكولن باجر اللّمة
ومن يصبح صبحنه وماكو انتي وياي ... ولا خالة ال تصبِّح أبَد لا عمّة
مثل طير ال تشلبه بهيدة عل حيطان ... روحي من البعد تصرخ ولج يُمّه
انا اشتاكَيت انام بحظنج زغيرون ... وآخُذ من حنانج ولو جم كلمة
تلولين واغمّض على اللحن نعسان... انا العاشكَ دلللول الولد يمّة
انا تمنّيت ساعة نسولف انه وياج... على العمر التطشَّر نرجع نلمّة
انا اشتاكَيت أشم ريحة خبز تنور... من ايدج اضوكن ولو بس لكَمة
انا الحنّيت اعاتب خاطرج هل يوم ... بلكن امر بيه تايه يدوّر اسمه
انا ال ماجنّي شبّيت ولفاني الشيب ... أدور حجاية منج ترفع الهمّة
شباب ابقى بحياتج والعمر بيه خير ... وخلافج دنيتي مكدّرة وظلمة
يه ماي العين يه حنينة تعالي اليوم ... انه المشتاق اشمِّج يُمّة وج يُمّة
هنيّاله اليصبّح كل صباح عليج ... وهنيّاله الغرف من طبخج وطعمة
وهنيّاله اليقبِّل وجنتج هل يوم ... وهنياله اليشوف شفافج مبسمة
اكرام حسن