أُحِبكٓ ...يا كلّ الحب

اللهم صل على محمد وآل محمد

احبك اِلَك مو لن طالب امراد
انا و گلبي نِوِن واهٍ وويلاي 

وأمشي لخاطرك جي ظلم مذبوح
يه مرضوض الضلع لنعاك مشّاي

اجيتك بس ردت تحسبني خَدّام
واعرفك تگعد وتستقبل الجاي 

چثيرة التظن انك شارة ودموع
وايمام وابن سيد ... وبس هاي

وچثيرة البچت همها وما بچت ليك
مشت تنخاك لن حاجاتها هواي

وچثيرة ال عل منابر زور تنعاك
و بلا خضر الدفاتر الك ماجاي

لچن خدمة صدك موجودة لحسين
بوسط بيت الفقير الضاف مشّاي

أجٓلْ موكب صدك بي مايه يفور
من لگمة حلال يشربٓك الچاي

وأجٓل دمعة مُحب من گلب محروگ
من عين الشروگي تِدِر چالماي

و أجٓل ونّه الك تدري بصدر وين
بصدر اخت الشهيد الماشرب ماي

و أجٓل عبرة حزن نسمعهه لاوين
چثيرة ايتامنا الما جاهه مولاي

و أجل دين النبي لولاك ماقام
يعَرِفها الما خضع لاحزاب دنياي

و أجَل يا سيدي بسوح الوغى رجال
عَلى دربك مشوا للموت حفّاي

يعرفونك عدل هاك اگعد وشوف
شباب وللشهادة مضوا بالراي

رجال وما تهاب الموت يه حسين
عهد لألله نِطَوا ما رجعوا بهاي 

فلا ترجع امية وبينا ظل روح
وولا دين النواصب يحكم الراي

انا يه حسين شيعي وبيك مجنون
انا موتي اعلى حبك هوَّ رجواي

انا يحسين عاشگ للوفى البيك
انا متيّم بصبرك حيل بصباي

انا من شوگ روحي جيتك ارثيك
عَلى راسي اوصلك لو تعب جدماي
اكرام حسن 05/11/2014
Ekram Hassan

يا علي

 ابن ملجم ياعلي بارض العراق ... جاينه بكل حقده ويبث غدره
ووكَفت وياه الرّبع مابين خان ... وبين غلّ سنين ساكن صدره
وبين تافه كَاعد بنص برلمان ... كان خادم بَعَث خلّص عمره
وبين طامع بالكراسي وبالعقود ... وما يهمه الوطن حفروا كَبره
وبين زنبيل الدول داير مدار ... عاف اخوته وبيدة نزّل قدره

وين سيفك يا علي يرد البغاة ... يرد خوارجهه ولحاهه الكَشره
مرحَب وصفين اجونه من الحجاز ... الجَّمل من عمّان مو بالبصرة
بالشمال اجتمعوا بمسجد ضرار ... واعلنوا حرب لمحبَّي العترة
ذبحوا اشرف ناس بغضا بالشريف ... وهمَّه ولد الباغيات القذرة
وين سيفك يا علي جانه اللعين ... واحنا منتظريك تقطع نحره
اكرام حسن 17/07/2014

الوحدة

وحدي بوسط عدوان ... خلّاني ال زمان
طعنة غريب تهون ... و لا طعنة اخوان

اكرام حسن 23/02/2014

ذكريات

احزمت احزاني ومشيت
بلهفة لحسين اعتنيت

ردته يسمع شكوتي
وبأيده يمسح دمعتي
ومن وصَلْت اعتاب بابه اتحيريت

يا هو من آلامِ اذكره
ويا جرح رايدته يبره

خفت الحّ بطلبتي
واختنكَت ابعَبرتي
وارجعت مهمومة بالدلّال حسرة

بدربي شفت بنيّة تحجي
بحركَه تشكيله وتبجي

تكَلّه باب الله عرفتك
مستجاب الدعا بكَبتك
والله مارد لك ابد مكسور يشجي

دِمْعَت عيوني وبجيت
وارجعت عنده ودعيت

رِكَدت متوني كَلتله
والحِمل ماعِدت احمله
اِو لا مِن ل داريتهم شي حصليت

*****

باب لألله وجيت ولهانه لحضرتك
تدري بيّه ذقت من لوعة غربتك

لا وطن وارتوي بميّه
ولا جدار احتمي بفيّة
ضاع تعبي بأيد ماراعت حرمتك

راح ارد يحسين من وين الاجيت
وانتظر نخوتك يم صاحب البيت

تظل عيناي على دربك
يوم عن يوم ابق احبك
وتبقى شمعه ... وانه ... من نورك زهيت
وتبقى شمعة

اكرام حسن 24/02/14

1

اليكم يا بني وهاب

فخخ , فجر , اذبح , دمّر ... واسفك دم الناس وكبّر
انفث كل حقدك وسمومك ... وبأعراف الدنيا استهتر
تتعشى ويا محمد ظنّك ؟ ... لو تشرب من ماي الكوثر؟
لا والخالق سبعة بستة ... ومحمد وحسين وحيدر
وي وهّاب بنار اجهنم ... زقوم لاحشاءك يصهر
الله الرحمة , محمد رحمة ... وانت وحقدك نار وتسعر
حتى الماعدهم اي شِرعة ...اشرف من كل اهلك واطهر
روح ابحث عن اصلك دَوره ... من يا جيفة ؟ وصاير عنتر؟

اكرام حسن 05/02/2014