عتاب

 

عتاب
دنية وقساوتهه شكثر
ضيم وصراعات وغدر
مأمنه كنت باللي هجر
ونار ال بكَلبي لاهبة
***
ايام عشناهه سوى
وبفرح نضحك للهوى
ضحكاته لجروحي دوة
وانسه الغدر , ما احاسبه
***
يطعني حييييل وما صحت
من شدة صوابي طحت
ولا كأني محبوبة كنت
يكَطع وريدي الراغبة
***
للغير يركض ماتعب
وانه لرمش عينه محب
ينساني يا وادم عجب
ولا كأني يوما صاحبه
***
مخنوك بالعبرة الصدر
والعين مدمعهه انحسر
ماظللي غير اجرع صبر
واترك عيوني تعاتبه
***
ولو كَلت اكرهه ... كاذبة

اكرام حسن
23/04/2013

طاح الصنم

         طاح الصنم 

طاح الصنم ... ولّى الصنم
خل تبتسم ام الشهيد
تتشفى بيه كَد ماتريد
الطاغي سويناه خروف
ونحرنا ليلة العيد
***
طاح الصنم ... ولّى الصنم
لحَّك باجداده بسقر
شما ذاقو اهو ادهى وامَر
ظالم قتل خير الشباب
بلادي خلّاها قفر
***
طاح الصنم ... ولّى الصنم
خَلَّف الالاف ومشى
مجلوبة كلهه مهورشة
تتغدى وياك الظهر
وتبوك بيتك بالعشى
***
طاح الصنم ... ولّى الصنم
صارت حلم الحكاية
اصنام اجتنا هواية
انتخبوا ازلام البعث
وام صبحة الملاية
***
كالوا صدك ... طاح الصنم
كَلنا نعود ديارنا
الضيعنه ليهه اعمارنا
تاليهه تهمونه خوارج
وال يمدهم جارنا
***
طاح الصنم ... ولّى الصنم
طاح العلج لا مايرد
ولزلامه سوينه جرد
لو تمشي ويانه عدل
لو للجحر رغما ترد
***
اكرام حسن 09/04/2013