نترجى من رب العلى ... صيحة بسمانا تنسمع
والوادم بجرف النهر ... مسرورة تعلكَلك شمع
حَسْنة امي للشاطي اعتنت ... مكسورة وتهل الدمع
ماعدهه شمعة لمولدك ... كَعدت وعلكَت لك ضلع
رادت تحشم مروَّتك ... صاحت يامولاي الفزع
ربيتهم عشرة بتعب ... شبّان واحدهم يشع
مابيهم العوزة ابد ... لا جانبوا حكَ وشرع
لاقصروا لجل الوطن ... ولا سلَّبوا وي الرَّبِع
سيف النَّصب باركَابهم ... لو كّال احبك تنكّطع
اِنْ طالب بحق انخطف ... ولو كتب شيريد اِنمنَع
ولو راد يبني هل وطن ... عبوة بطريقة تنزرع
حيف يتصايدهم نذل ... وسيفك لغمده مانزع
اظهر يامولاي العجل ... ملينة تدري بالوضع
اظهر يمهدي شمنتظر... مو خلصوا البيهم نفع
مو ذبلت الروح وعلي ... منتظرة بدرك ماطلع
حَسْنة امي ماكَطعت امل ... منك تنشف الهه الدمع
ظلت تناديك العجل ... والراح للشاطي رجع
يا المهدي حَسْنة ما اِجت... والنَفَس عل شاطي انقطع
وشمعتهه ما اظن انطفت ... نيرانهه توج بالضلع
اكرام حسن
No comments:
Post a Comment