تقدملي فد واحد صلف
سمّوه الي : مطشر خلف
كَاعد ويحجي اعلى الخلق
ويسجل بصفطة ورق
ياهو الطلع ياهو الاجه
ياهو اللي عن طوره انحرف
والناس من اللي اكتبه
تاخذ وتنشر بالصحف
مخبوصة هل وادم عليه
مثل المحابس بين اديه
وعمي وخوالي وكل هلي
وصفوه الي بارقى الوصف
كالو شكَد بختج عدل
جالج ابن اصل وفصل
والناس تمدح بيه , نَفِل
محّد ابد مثله انعرف
****
بنت المدينة آنه كَلت
من صحت باسمة تفشَّلت
حتى البنات بديرتي
ضحكن وكَالن نقترح
غيروا الاسم , شيلوا حرف
اسمج لحن معناه كرَم , ومطشر: ابداً مو اِسم
يعمامي ما اكَولن نعم
****
كالوا أَبَد ؟!!!
خيّال مثلة مانِرِد
لو تصبحين بعهدته
لو عظّي اصبع للندم
ماعدنه بتّ التنحرف
وتخالف اطباع وعُرُف
****
اِفترّيت بحزاني و دخت
ومن غبشة لمطشّر رحت
بلكت يبطل خطبته
من اهلي ويردّ بكلمته
ويحسبني وحدة وتنحذف
****
من بعيد عاينته يوِن
ويكول لا مو بالوطن
الايتام لا ماتنغبن
كالولة سد عوينتك
وداري ياصاح خبيزتك
ناس اتخبِث ماتنعرف
والعيش يمطشر كلِف
****
كَلهم وحك حيدر علي
لو باكَوا اخواني وهلي
لفضحهم بكل الصحف
تدروني ماخاف وصَلِف
****
من اِسمعت حكية اِجفلت!!!
مو لنّي من عنده خفت
لكن احس بداخلي
كلبي تلوَّع وارتجف
كَمت احسب وريكَي نشف
معقولة ارفض هل ولد؟؟؟
وامشي ورى فطيمة ورغد !!!
اه اُمّده اصحابي الجِلِف
كَلت ارجع بساع الهلي
خطوة مشيت ,,, وصاح الي
شسمج يخيتي تفضلي؟؟؟
****
كرّومة ,,,وابصملك نعم
جيتك أخبرك بال نعم
للطيبة البهذا الكَلب
لحجيك الخالي من الجذب
وخوفك من الله الينعرف
واقسم وحك حيدر علي
واحد من مطشّر بالف
وبهيدة شاورني بلحن
عيوني ولج ,,, ردي لهلج
وباجر انه واهلي لكم
مشايه والله اندللج
****
وسهرت ليلي وما نمت
حيرانه الف حسبة حسبت
خافنه ينسى وما يجي
لو عن وعوده ينحرف
طرّ الفجر ,صار الظهر , جانه العصر
واسمع هلاهل عمتي
وهوسات لبنيهه تزف
****
وجتي الزلم تحجي العدل
وعمي واخوتي اعلنوا
عل نبي صلوا وعل اهل
****
وبين الهلاهل والصفك
بالباب لن ميّة تدك
لحظات وللهوسة اسمعت
دخلت حثالة منكَبة
كومة زلم ماتنعرف
****
صياح انكَلب بينه الحفل
جيبووه صاحوا هل نذل
مايلزم لسانه القذر
يحجي على اسيادة ويصفّ
****
صاحت الوادم عمّي لا
هذا ابن حجي خلف
طالَب بحق اهل الضعَف
وراد اليحكمون بشرف
****
كَلهم اجيتو مسلحين
عللي حجاله كلمتين
ما اسكت ودم الحسين
لو نحصي اموال البلد
ومَن زرع عبوات وخطف؟
لو اندفن بارض النجف
****
كَللولة سهلة طلبتك
وخل تنعى أُم الجابتك
طااااخ...طاااااخ
لالا صحت ,,, حيل اصرخت
والزهرة ماظالم احد
انه شفت ,,, باذني سمعت
لحكَو هلي دمة نزف
شدّوا الجرح بلكن يخف
يُمّه أشو لونه انخطف
كللي ولحن صوته ضِعف
عيوني اِلج ,,,
وسفة تردين الهلج
لنّه العمر مني انخطف
لالا لا لالا صحت
وتحسرت
ثم اسكتت
بأيدي أغمضت عين الولف
ودموعي انهار وتصب
تجري وأبد لا ما تِكَف
ولليوم دمة ما نشف
فخري وحبيبي وقائدي
مطشر ابن حجي خلف
No comments:
Post a Comment