الى الله المشتكى
معذّب ياالهي ليش انا دوم ... مو حيلي انهدم من كثُر الهموم
كل يوم آني اكَولن تُفرج اليوم ... ولا حزن ال يظل لا حالٍ ايدوم
بعدني ما ِتنفَّست الهوى الهاب ... وشفت شمس ال تلوّح بين الغيوم
لنّي بهَم جديد ايحطّم جبال ... واَشوفنّي طريح و مكَدر اكَوم
ياربي شلون تاليهه ويا الايام ... جنهه تعهدت تظلمني للدوم
كلما التفت يمنه اشوفن ضيم ... ومن التفت يسرى الكَاني مصدوم
شَعدد من مصايب شحجي آلام ... مو انت العليم ال ما غفل يوم
تدري شصار بيَّه وتدري شيصير ... واصعبهه تحل من قبل لا اكَوم
ياربي شعطّل امرك وانتَ رزّاق ... كريم انتَ وجواد على الخلق دوم
جا وين الفرج تدريني زهكَان ... واخافن تزل روحي وتبتدي تلوم
لا تجرّب عليّ حلمك انا ضعيف ... ولا تمتحن كَلبي تدري مهموم
سنين وانتظر منَّك هل مراد ... عليّ لا تبخل او حاشاك قيّوم
اريدن كُنْ تكَول ومعجزة تصير ... وتزيد بحكَ الاربع عشر معصوم
No comments:
Post a Comment