حلم عشتة وكَلت يومين و يصير... او وكَفت بباب دهري اتأمل يمر
وشفت ناس التروح وشايلة احلام ... وناس هواية ترجع والكَلب مِنسَر
وناس القدر يتوسل تعال انطيك ... شنو تريده يصير بدون ماتحضر
وناس من الشبع مَلّت من الاحلام ... غميكَة سلالهه وعل كَاع يتطشر
وانه وحلمي الوحيد مناطرين سنين ...بلكت يلتفت راعي العطايا البَرّ
دِ حِنّ اِلحالتي مو تعبت الرجلين ... حتى الحلم كام عليه يتبَطَّر
اسد الباب ؟ مو كالوا كريم جواد !... عجيبة انتظر وال - كُن - بيدك وتؤمُر
عجيبة تشح عطايا مالك الاكوان ... وغريبة النبي وآله مِنّي يتعذَّر
انقفل باب الحوائج ؟! ليش؟مو مفتوح للرايح وجاي وبالعطى يشَمّر
عجز حماي زينب مايرد العال ؟! ... حشا وكل مَن نخاه يلكَاه متحضِّر
والحسين ايتخلى شلون هاي تصير؟! ... الا ان كان وعد الباري متغير
واذا توصل مواصيل الزمان لهاي ... على الروح العفى وما اريدهه تعمُّر
اكرام حسن
2011
No comments:
Post a Comment