يامن بيده ناصيتي ...(يَمَن بيده النواصي)
يَمَن بيدة النواصي جيت الك شكّاي ... مَحضَر تفتح اِل قصتي وتقاضي هواي
بِنِت عزّ ودلال وهلي ناس اَجواد
رضيت بعازته وضعفه وشحيح الزاد
كَلت دنية وتدور ورزق ربّك رادّ
ومن دارت دِنِيته وخيره كلش زاد
هجرني وكَال حُرّة والرِجال هواي
ترضى بهاي ؟!
يَمَن بيده النواصي جيت الك شكّاي ... محضر تفتح ال قصتي وتقاضي هواي
فرشت العين لاقدامه وكَلت خِلّي
وعفت ديرت عمامي وصحبتي واهلي
وصرت ناعور تفرغ سطلتي وأَملي
ولا يوم ال شكيت وانه بت اصلي
ولا فكّرت اعوفة وهوّه ناوي اجفاي
ترضى بهاي ؟!
يَمَن بيده النواصي جيت الك شكّاي ... محضر تفتح ال قصتي وتقاضي هواي
يقاضي الحق وعمري الراح شيردّه
وجرح ذيج السنين غميق شيضمده
وحلم عمري ال بنيته بلا ذنب هَدّه
على جتافي صعد ظنّي يفي بوعده
واول ماشطح سجّينه حط بجلاي
ترضى بهاي ؟!
يَمَن بيده النواصي جيت الك شكّاي ... محضر تفتح ال قصتي وتقاضي هواي
ما اريد الاجر ياقاضي عل عِشرة
ولا جنة مقابل عشرته المرّة
ردت تاخذلي عمري ال ضاع من عمره
وردت اسكن خلافة بجنته وقصرة
يقاضي الحق قنوعة وما طلبت هواي
وانه ارضى بهاي
وادريك انت ترضى بهاي
يَمَن بيده النواصي ........
اكرام حسن
18 رمضان 2010
No comments:
Post a Comment